Hugleiðing um hlaup

Maður getur velt fyrir sér hlaupum, verið með getgátur um hlaup, pælt í því hver mætir, hvers vegna, hvernig veður er, hver þjálfar, hvernig ástandi mannskapurinn er í, hvert er farið, hvað er sagt. Sumir upplifa herlegheitin, aðrir eru eymingjar og geta ekki hlaupið. Slíkan stimpil hafa í dag undirritaður, opinberlega skipaður annálaritari Hlaupasamtaka Lýðveldisins, og opinber Blómasali Samtakanna. Við vorum svo aumir í dag að við gátum ekki hlaupið, en það gátu ýmsir af helztu máttarstólpum Hlaupasamtakanna: Gísli, Ólafur Þorsteinsson, Vilhjálmur, Magnús tannlæknir, Haukur, Eiríkur, Helmut, Þorbjörg, Anna Birna, og einhverjir fleiri. Ég mætti þeim í inniklefa (þó ekki konunum!), mér var svo kalt að ég treysti mér ekki til að fara út. Ég öfundaði þá af því að eiga hlaup í vændum, en lét vita að ég myndi ekki hlaupa. Fór út í pott og undi mér vel þar.

Furðu snemma þótti mér menn koma tilbaka til laugar, ekki var langt farið. Menn voru hissa að sjá mig í potti. Spurðu hvað hefði hindrað hlaup. Ég sagðist vera meiddur. Gísli horfði á mig, og sagði: "Þú ert með báða fætur áfesta. Hausinn er á sínum stað. Hver eru meiðslin?" Ég hélt mikla ræðu um sjúkdómavæðingu sænsks samfélags, þar sem menn mega ekki lýsa yfir vinnuleiða öðruvísi en að vera stimplaðir aumingjar og settir í förtidspension, "þú átt það skilið að þér líði ekki svona illa" - ég flutti mikið fagnaðarerindi um aðra nálgun íslenskra yfirvalda, og tók dæmi af dr. Friðriki sem hefur trekk í trekk dæmt próf. Fróða heilan heilsu, þegar sá síðarnefndi hefur hóstandi grunnum hósta, reynt að fá menn til þess að fresta sjósundi. Hefir þá téður dr. Friðrik lýst prófessorinn heilan heilsu og talið sjósund til þess fallið að bæta heilsu hans. Þarna er vel lýst muninum á nálgun heilbrigðisyfirvalda í Svíþjóðu og á Íslandi til lýðheilsu.

Ég sýndi þolinmæði og beið eftir mínum bræðrum í pott, komu loks Gísli, Ó. Þorsteinsson, Blómasalinn og fleiri. Þar var löng seta, við sáum VB koma út í handklæði og væntum hins versta, en sem betur fer hvarf hann snögglega inn aftur. Rætt um sjúkdóma, sjúkdómavæðingu, öfgar í hlaupum og fleira því tengt. Nú eru framundan sveitarstjórnarkeppnir í þekkingu, og verandi helztur Öðlingur Reykjavíkur hefur Foringi Vor til Lífstíðar valið keppnislið Vesturbæjarins gegn öðrum sveitarfélögum; mun vera uppi tensjón mikil og reynir á vináttu ónefndra Fóstbræðra. Verður gaman að heyra hvert framhald verður þar á.

Íslenzk tunga er í fyrirrúmi í potti, þar nýtur hún stuðnings og aðhalds, þar er reynt á þanþol tungunnar og ýmis afbrigði reynd. Í potti eru sagðar sögur, þar eru menn leiðréttir miskunnarlaust fari þeir vitlaust með mál Jónasar. Er það enda eitt af yfirlýstum markmiðum Hlaupasamtakanna að bæta málfar og skipulega hugsun hlaupara, sem oftar en ekki eru dæmdir sem hálfvitar sökum áhuga síns á hlaupum. Svo var og í potti í dag - þar var mikil leiðrétting málfars, og er það vel.

Nú hverfur ritari enn á ný til skyldustarfa á erlendri grund, hleypur næst á föstudag. Í gvuðs friði.

Aumingjar

"Þú ert aumingi!" "Já, ég er aumingi." Þessi orðaskipti fóru milli mín og ónefnds álitsgjafa þegar mætt var í pott í morgun. Ég hafði sofið yfir mig, var slæmur í baki og auk þess illa fyrir kallaður vegna kvöldverðarboðs í gærkvöldi. Af þeim sökum var ekki hlaupið af minni hálfu á þessum góða degi. En hlauparar voru: Vilhjálmur, Ólafur Þorsteinsson, Jörundur, Guðmundur og Birgir. Blómasalinn var að snövla í potti, óhlaupinn með öllu. Veittist að ritara sem þar sat, óhlaupinn líka, með óbótaskömmum. Vilhjálmur var bara vinsamlegur, bauð góðan dag, og sýndi fullkominn skilning á bágindum ritara. Það var hvasst í dag, en engu að síður fóru hörðustu hlauparar Hlaupasamtakanna í hefðbundið sunnudagshlaup.

Jörundur var með glýju í augum. Hann hljóp líka í gær, laugardag, með þjálfara. Fjórir karlar og sex konur mættar, allar nýjar að sögn Jörundar. Kvaðst hann mundu hætta að hlaupa með okkur Geirfuglunum, eins og hann orðaði það. Þarna væri saman komið metnaðarfullt fólk sem legði ekki megináherslu á að segja sögur og blaðra um nágrannann, heldur á það að hlaupa og ná árangri, verða betri.

Að sögn viðstaddra var frændi minn, Ó. Þorsteinsson, meiddur og fór bara stutt. Hann hljóp út í kirkjugarð, sneri við þar og stefndi tilbaka. Menn sögðu honum að meiri skynsemi væri að halda áfram, það væri líklega styttra og hægara. Nei, það var ekki hlustað á slíkt. Farið um Veðurstofuhálendið, Klambratún, Laugaveg og í skjóli tilbaka, yfir ælu og hlandpolla skemmtanaglaðra Reykvíkinga. Rifjað upp að Blómasalinn var nær orðinn fyrir spýju Austurstrætisróna í föstudagshlaupi þar sem hann hljóp framhjá Höfuðstöðvum Bjórólfa. Skeiðað upp Túngötu.

Nú skal frá því sagt er ónefndur banki hélt hátíð 100 beztu viðskiptavinum sínum: mat flogið inn frá París og hver rauðvínsflaska kostaði eina milljón. Sama dag ákvað samkeppnisbanki að halda 100 beztu viðskiptavinum sínum enn betri veizlu, þeim var flogið með einkavél til Mílanó, þar var snætt á flottasta veitingastað bæjarins og að því loknu var farið í óperuna. Þessar fréttir voru fluttar í hlaupi Hlaupasamtakanna um daginn, en ekki er vitað hver heimildarmaðurinn er.

Í pott dagsins voru mættir helztu máttarstólpar Sunnudagshlaupa: dr. Baldur, dr. Einar Gunnar, Mímir, og svo valinkunnir dáindismenn hlaupnir: Villi, Ólafur Þ., Blómasali, Birgir, Jörundur, Guðmundur, og loks var mættur ritari. Hann lýsti sig þegar vanhæfan til þess að vitna um atburði, samtöl og frásagnir. En menn heimtuðu að atburði yrðu skráðir - og ekki skipti máli þótt ritari væri óhlaupinn. Var lýst fjálglega hlaupi, sögum, ræðum ávörpum, gamansögum, m.a. einni sem Vilhjálmur ku hafa sagt.

Staðfest að bæði Blómasali og Ritari voru farnir að heilsu, slæmir í baki og illa haldnir. Óljóst hvenær þeir geta snúið aftur til heilbrigðra lífshátta og hreyfiingar með félögum. sínum.

kv. ritari

Sjór og sól

Já, sólin skein glatt í gær, föstudag, er hlauparar í Hlaupasamtökum Lýðveldisins mættu til hefðbundins föstudagshlaups, enda engir þjálfarar sjáanlegir. Svo margir voru mættir til hlaups í þetta skiptið, eitt samfellt mannhaf, að undirritaður treystir sér ekki til að nefna alla með nafni. Skal þess þó getið að ekki færri en þrjár konur hlupu með oss. Konurnar voru Brynja, Rúna og Kristín Andersen. Denni sagðist vera sendur af Nesi til verndar konunum "þeirra" - og virtust menn hafa áhyggjur af að ella yrði farið að atast í þeim. Mikið rætt um heilsufar hlaupara, ástand manna eins og Ágústs og Sjúl rætt og greint - ekki talið líklegt að þeir létu sjá til til hlaupa næstu missirin.

Farið fetið inn í Nauthólsvík, hægt var farið og Vilhjálmur hélt forystunni langleiðina, mættum Jóa sem kom á móti okkur og slóst svo í hópinn. Í Nauthólsvík fórum við Gísli og Flosi í sjóinn, hann var yndislega kaldur og svalandi. Á meðan beið hópurinn uppi á landi og fylgdist með. Við fórum upp úr og hlupum áfram, við Gísli fórum Hlíðarfót, en aðrir fóru hefðbundið. Flosi og Einar blómasali skiptust á að hjóla og hlaupa, báðir eitthvað bilaðir í skrokknum. Er komið var tilbaka var það almenn niðurstaða hlaupara að bezta jólagjöf hlauparans í ár væri göngugrind - það kæmi í veg fyrir að menn væru alltaf dettandi. Efna mætti til göngugrindarhlaups, út að pylsuskúrnum og tilbaka aftur, það tæki svona álíka langan tíma og að fara aumingja.

Í fyrramálið er hefðbundið sunnudagshlaup. Í gvuðs friði. Ritari.

Þeir síðustu verða fyrstir...

Mikið rigndi í dag er þessi hlaupari mætti til hlaups, engu að síður var ákveðið að fara í útiskýli. Ég grennslaðist fyrir um Iðnaðarbankahúfuna mína og hlaupavettlingana sem ég hef ekki fundið um tíma, ef einhverjir góðir félagar hafa óvart stungið þeim niður hjá sér mega þeir láta vita, og ef vel stendur á, að skila þeim. Mættir: Flosi, Kalli, Jörundur, Haukur, Magnús, Guðmundur, Ólafur ritari, Una, Þorbjörg og Rúnar þjálfari. Svo mætti Birgir á síðustu stundu niðurrigndur á reiðhjóli sínu, og órakaður blómasali birtist rétt um það bil er hlaup átti að fara af stað. Hann sýndi engan asa á sér, settist niður og fór að draga upp kvittanir úr ýmsum vafasömum verzlunum sem hann hafði heimsótt í Danmerkurferð sinni í gær. Kvaðst hafa fengið far með einkaþotu um morguninn, og verið kominn í fríverzlunina um kvöldið. Af kvittunum mátti sjá hvílíkur bílífis- og óreglumaður hér er á ferð, og vanrækir þar að auki hlaupin sem gætu hugsanlega verkað gegn þessum óhófslifnaði.

Þjálfari lagði línurnar fyrir hlaup og uppálagði okkur að hvíla kjálkana á leiðinni - lagðist það illa í viðstadda og kom upp kurr í liðinu. Varð þjálfari tilneyddur að hörfa á þessum punkti, en bað menn að gæta þess að hafa ökklana slaka og hlaupa hallandisk ívíð framávið. Kalt og blautt utandyra eins og s.l. mánudag - merkilegt með þessa þjálfara og veðrið sem fylgir þeim! Lagt í hann. Nú var ritari ekki síðastur, hann hljóp fremstur í flokki með þeim Magnúsi og Guðmundi á 5 mín. tempói. Ég reyndi að fiska einhverjar sögur upp úr Magnúsi eftir sóknarnefndarfund, en þær samkomur virðast farnar að vera ansi bragðdaufar, engar safaríkar sögur lengur. Einhvers staðar í Skerjafirði fór Una fram úr okkur og höfðum við á orði hvílíkur hlaupari þar færi, skeiðaði fyrirhafnarlaust áfram og virtist ekkert hafa fyrir því að fara á tempói vel undir 5 mín. En hinir hlunkarnir voru langt fyrir aftan og erfiðuðu, samt heyrðist alltaf í Birgi, hann samkjaftaði ekki.

Búið var að gefa út tvær leiðarlýsingar, 8 km og 10 km. Vitanlega fórum við lengri leiðina, austur Flanir og fyrir neðan kirkjugarð, út að Suðurhlíð. Þar er löng og erfið brekka sem sumir menn dásömuðu á Brottfararplani, hún væri löng og krefjandi og það væri beinlínis yndislegt að hlaupa hana. Sömu menn sáust ekki í þessari brekku. Við Magnús, Jörundur og Haukur fórum brekkuna. Upp hjá Perlu og þaðan niður á Stokk. Upplýst var að hringt hefði verið í próf. Fróða. Hann er tognaður og hefur fengið tilmæli um að hvíla í þrjár vikur, en ætlar að hvíla í átta vikur. Heimildarmaður sagði að prófessorinn væri bugaður, og hefði verið stutt í kjökrið þar sem þeir skiptust á orðum gegnum símalínurnar. Var þá haft á orði að varla væri Karl snúinn tilbaka til hlaupa þegar prófessorinn hyrfi af vettvangi. Menn voru sammála um að þetta væru dæmigerð byrjendamistök, verandi með tilmæli frá lækni um að hvíla í þrjár vikur, mæta til hlaups og segjast ætla bara að hlaupa hvíldarhlaup, enga spretti, en spretta svo úr spori, reka tána í, taka flugið, fá harkalega lendingu og togna í leiðinni. Það væri eitthvað að hjá svona fólki. Eftir á var spurt hvort svona menn fengju ekki sjálfkrafa einkaflugmannsréttindi - "jú," var svarað "og það líka á hjóli; hann ku vera einkar lunkinn á flughjóli".

Er komið var niður að Valsheimili mættum við þjálfaranum og hann lét okkur taka þrjá hálfrar mínútu spretti, það var ágætt. Komum blautir og þrekaðir tilbaka. Hittum fyrir hina styttingana á Stétt. Þar var rætt um grasmaðka, sem eru stórir og afkastamiklir á Norðurlöndunum, Birgir lýsti því þegar hann sá mikla maðkaveitu hafandi nagað upp heilt belti af lúpínu. Hér lyftist Jörundur allur og andlit hans lýsti eins og tungl í fyllingu. Mun þetta hafa verið á Flönum á Sunnmæri. Rætt áfram um nágrannaerjur þeirra Birgis og Jörundar, köttinn Birgis sem ævinlega mígur og skítur undir pallinum hjá Jörundi og hvernig maður gerir út af við ketti. Einhver nefndi edik, Birgir hótaði með smjörsýru á móti. Magnús vildi leggja Birgi lið og bauðst til að skjóta lúpínufræjum yfir á lóð Jörundar...

Þannig lauk þessu hlaupi, áberandi var fjarvera ónefndra fóstbræðra, og var þarafleiðandi mikið rætt um þá, sérkenni þeirra og fyrirætlanir. Gott hlaup. Ritari.

 

Vinslit?

Er von maður spyrji hvort vinslit hafi orðið í Hlaupasamtökum Lýðveldisins í dag í hefðbundnu Mánudagshlaupi, sem var svo óhefðbundið og óvenjulegt sem orðið getur, og lái manni hver sem vill. En meira og nánar og í pistli dagsins, sem ef að líkum lætur, verður óvenju langur sökum þeirra miklu atburða er urðu á tiltölulega stuttu hlaupi.

Fyrst er frá því að greina að til hlaups mættu Þorvaldur, Ágúst, Vilhjálmur, Ólafur Þorsteinsson, Ólafur ritari, Friðrik læknir, Haukur, Una, Þorbjörg, Margrét þjálfari, Jóhanna hlaupari sem ég kann ekki að greina nánar frá (sumsé ekki dr. Jóhanna), Helmut, og svo karlmaður sem ég kann ekki að nefna. Það var náttúrlega arfavitlaust veður og ekki hundi út sigandi, og var þjálfara bent á það að alla daga sem hún hefði þjálfað hefði veður verið með ólíkindum leiðinlegt. Varð fátt um svör hjá þjálfara. Það var kalt og blautt utandyra og ljóst að menn verða að fara að draga upp vetrargírið, húfur og vettlinga og síðbuxur. Eins og menn skilja var ástandið ekki gott hjá þessum hlaupara, nýkominn frá Skotlandi, en skozkir eru gleðimenn og matmenn. Hann sýndi þá hyggni að halda sig með öftustu mönnum, enda var frá nógu að segja. Vildi svo til að þeir frændur og nafnar voru aftastir í hlaupi dagsins og má segja að ekki hafi fallið niður tal allt hlaupið. Var m.a. sagt frá merkilegum kappleik í Edínaborg, Hearts Midlothian gegn Glasgow Rangers, leik sem lyktaði með sigri Hearts, 4-2, og mætti til samanburðar segja, að leik KR og FH hefði lyktað með 6-1 sigri KR, svo söguleg var stundin, og hefur annað eins ekki gerst í samanlagðri sögu Hearts, sem hófst 1875. Þar léku 40 íslenzkir áhorfendur lykilhlutverk, íklæddir litum stuðningsmanna Hearts og öskruðu sig hása af æsingi, og hefði sumum óupplýstum viðstöddum dottið í hug að hér væru sannar fóboltabullur mættar á svæðið.

Það er allt í lagi að hlaupa aftastur. Mikilvægt er að mönnum líði vel á hlaupi og að þeir reyni ekki um of á sig, umfram það sem eðlilegt getur talist. Þannig var okkur nafna farið, lengi hlaups hlupum við með Vilhjálm fyrir framan okkur. Svo kom Helmut, maður sem er svo illa meiddur að kraftaverki er næst að hann skuli fara fetið, hann tætir fram úr okkur, og ætti að vera fjötraður við spítalabörurnar, nei, það er bara sprett úr spori, við á eftir, enn aftastir. Lengi hlaups virtist sem við værum að ná Vilhjálmi, en þá gaf þessi léttfeti úr öðru sveitarfélagi í og skildi okkur eftir. Við áttum í hávaðasamræðum, m.a. um téðan Vilhjálm, en hann lét sem hann yrði ekki var við okkur.

E-s staðar á Nesvegi mættum við Neshópi, hróp voru gerð að Vilhjálmi, líklega til þess að heiðra hann. Hrópin voru eitthvað á þessa leið: "Heill sé þér, ó!, þú mikli álitsgjafi!, Vilhjálmur.. o.s.frv." Okkur brá mikið við þetta og vorum lengi að jafna okkur á eftir. Svo mættum við okkar fólki sem kom hlaupandi á móti okkur - þá var þéttingur í gangi. Faxaskjólsþéttingur. Við fórum Faxaskjólið á hægu tölti, en sameinuðumst svo hinum í þéttingi um Faxaskjól. Þaðan í sund, enda menn þungir og hægir á sér eftir aðgæzluleysi síðustu daga. Við stóðum á tröppum Vesturbæjarlaugar þegar próf. Fróði kom haltrandi tlbaka, líklega búinn að slíta vöðva, að eigin sögn. Hann fékk greiningu læknis á tröppunum: það er ekkert að þér, þú hefðir betur farið í sjóinn s.l. miðvikudag! Ágúst hafði sumsé tekið einn sprettinn, rekið tána í og átt flug í vændum, en kaus að lenda fyrst á eigin forsendum. Þá var eins og eitthvað slitnaði í bakinu á honum.

Í potti urðu geysilega miklar umræður, vísbendingaspurning sem VB mátti glíma lengi dags við, en réð á endanum. Vinslit urðu milli ákveðinna aðila í potti, m.a. voru sumir ásakaðir um að taka ekki hlaup með þjálfurum alvarlega - þá urðum við frændur kyndugir á svipinn, en ekkert meira. Það rifjaðist upp fyrir ritara að Karl var mættur til hlaups í dag og var bara brattur. Næst er hlaupið á miðvikudag. Verður farið langt? Ritari.

Ungur maður með glæsilega framtíð að baki mætir til hlaups

Það er skammt stórra högga á milli í Hlaupasamtökum Lýðveldisins. Í síðustu viku mætti Ólafur Þorsteinsson í fyrsta skipti til reglulegs hlaups í miðri viku í áratugi. Í dag gerist það að Karl kokkur mætir eftir áralanga fjarveru, eins og hann hafði lofað í sumar. Hann er óðum að ná sér af meiðslum og var inntur fregna af stöðu mála í bakteríu- og veirufræðum. Þar á bæ eru menn á vaktinni. Enn var Ó. Þorsteinsson mættur með Iðnaðarbankahúfuna, og Flosi kom til þess að hjóla með hópnum. Þar með voru mættir einhverjir mestu máttarstólpar og víðfrægir hlauparar Samtaka Vorra - og varla á það bætandi, en nei! Téðum dánumönnum til viðbótar voru mættir margir aðrir frægir hlauparar og afreksmenn, miðaldra gæðablóð sem elska allt er lífsanda dregur og setja svip á umhverfi sitt: Vesturbæinn. Ein kona mætti, Rúna. Þjálfarinn Rúnar lagði línurnar fyrir hlaup og bað menn að hlusta eftir því hvernig skórnir létu: eftir þeir rispuðust mikið við undirlagið værum við að hlaupa vitlaust og skapa óþarfa mótstöðu. Magnús sagði hugsi: hef ég verið að hlaupa vitlaust í tuttugu ár?

Það vakti athygli að próf. Fróði var ekki mættur, þótt miðvikudagur væri og kostur ger á sjóbaði. Viðstaddir töldu að líklega væri verið að þvo hlaupagírið hans eins og það leggur sig. Hvaðan þeim kom sú vitneskja er mér hulið. Þegar svo ágætur hlaupari og afreksmaður sem prófessorinn mætir ekki gerbreytist stemmningin í hlaupi, menn verða afslappaðir og tillögur um að fara hægt og stutt fá hljómgrunn án þess að menn þurfi að lýsa yfir því að þeir séu aumingjar. Það var gefið út að farið yrði stutt og á rólegu tempói, sjóbaði sleppt. Ég hafði áhyggjur af því að Gísli og Friðrik myndu ærast, en þeir héldu ró sinni og voru bara heimspekilegir yfir tillögunni. Septemberbaði er enda lokið, og þótt Gísli hafi misst af því gefst enn tími til að bæta úr því.

Það voru farnar bakgarðaleiðir, gamalkunnar leiðir gegnum bakgarða Vesturbæjarins sem yfirleitt eru farnar þegar vindur blæs (sem hann gerði ekki nú) - farið fremur rólega svo að hópurinn tvístraðist ekki. Komið út á Suðurgötu og farið í Fjörðinn. Hér yfirgaf Karl hópinn, og stuttu síðar snöri frændi minn, Ó. Þorsteinsson, við. Það er eins og hann þrjóti örendi þegar VB er ekki með til hlaupa, hann þrífst bezt á umtali og aðfinnslum álitsgjafans. Ég fór þetta bara rólega og var búinn að gefa þá áætlun út að ég færi Aumingja, fékk mér vel að eta í hádeginu og ekki í miklu hlaupastuði, með mér ætluðu Björn kokkur og Birgir jógi. Björn kokkur er öðruvísi kokkur en Kalli kokkur, Björn er í kokkamennsku, en kokkamennska Kalla er annars eðlis. Um þetta var kallsað á hlaupum eins og venjulega og ekki við öðru að búast. Birgir talaði hátt og mikið eins og venjulega, m.a. um org sem stundað er í Vesturbæjarlaug á morgnana. Sagan segir að Birgir hafi átt yndislega æsku í Vestbyen, sem aðeins var trufluð af ástarkalli sem vakti hann á morgnana og hann taldi vera frá óræðri fuglstegund, fuglinn hrópaði í falsettu: Vilb Org. Birgi fannst þetta ljótt org, hann vaknaði á morgnana við orgið og fannst hlutskipti sitt ekki gott. Nú er staðan sú að á morgnana vakna íbúar svæðisins sem markast af Einimel í suðri, Kaplaskjólsvegi í vestri, Hringbraut í norðri, og Birkimel í austri, af miklu orgi í falsettu sem kemur úr hálsi fyrrgreinds Birgis. Svona er Sagan, hún fer í hringi og hefur okkur þátttakendurna að leiksoppi. Höfum við ekkert lært?

Farið í Nauthólsvík og þar stóðumst víð þá freisting að fara í sjó, sem er synd í sjálfu sér, hefði verið gaman að gera prófessornum þá skráveifu að fara án hans í sjó. Sumir vildu fara um Hlíðarfót, Björn beygði af og fór Hlíðarfót, sem var í trássi við fyrirmæli þjálfara, sem einhver kallaði kroppatemjara. Þjálfarinn vildi teygja okkur aðeins lengra, fara um stígana í Öskjuhlíðinni, það væri litlu lengra, en vel þess virði að fara. Hann var upplýstur um merkingu hugtaksins "ágústínsk stytting" og að við værum vön tillögum af þessu tagi, um styttingar sem leiddu til lengingar. Engu að síður var farið að tilmælum þjálfara, farið upp í Hi-Lux og þar inn í skóginn í vesturátt, á skógarstígum og niður á Hlíðarfót. Þar var ég allt í einu orðinn aftastur, en var alveg sama, og lýsir það vel þeirri afslöppuðu stemmningu sem ríkti í dag, enginn asi, engin taugaveiklun yfir tímum - bara reynt að njóta hlaups og þeirrar ununar að vera úti í náttúrunni í fögru haustveðri, úri, 14 stiga hita, í vaskra sveina hópi.

Við Friðrik rákum lestina, af fjórtán manna hópi, og áttum heimspekilegar samræður um það sem gæðir lífið lit og fjörvi. Sett fram kenning um hlaupara, með skírskotun til aldurs og hlaupatíma. Er komið var í pott vék kvenfólk undan og við höfðum pottinn út af fyrir okkur. Upp kom byltingarkennd hugmynd um að leggja af minningagreinaritun í Dödens avis - og virtist oss það ekki einasta vera sneið til Ó. Þorsteinssonar, heldur beinlínis atlaga að helzta áhugamáli hans og því sem heldur sunnudagshlaupum gangandi, áratugum, ef ekki öldum eftir að þau hófust (munið Papeyjarhlaupin!) - þjóðfræði og persónufræði. Á endanum var þessi máttlausa tilraun kveðin í kútinn og staðfest að upplýsingar, fregnir og fróðleikur af náunganum sé einhver traustasta undirstaða í starfsemi Hlaupasamtakanna, hefur sama hlutverki að gegna og vítamínsprauta afreksmanninum (með fyrirvara um að vítamínsprauta sé yfirleitt til, ég hef aldrei séð hana, þaðanafsíður fengið hana, enda er ég ekki afreksmaður í neinum skilningi og vafamál að vítamínsprauta bætti þar úr því sem upp á vantar). Upplýst að Ísland væri einu marki yfir í kappleik við frændur vora N-Íra.

Næstu daga dvelur ritari með frændum vorum, Skotum, og mætir ekki aftur til hlaupa fyrr en n.k. mánudag. Lifið heil á meðan, hlaupið af krafti!

Úr

Úr er hvorugkynsorð sem alla jafna merkir úði eða suddi. Svo skemmtilega vill til að það getur einnig merkt önugleiki eða jafnvel geðvonska, sbr. úrillur. En um það skulum við ekki fást, heldur beina huga okkar að hlaupi dagsins, en Kára til upplýsingar skal það sagt að hér á landi er nú hvassviðri og rignir eins og hellt væri úr fötu. Aldrei mæta fleiri til hlaupa heldur en þegar veður eru eins og í dag - en stóra spurningin er: kemur Karl? Það er jú 12.

Mikilli úrkomu spáð - Inn-diss-lekt!

Miðvikudagar eru dagar langra hlaupa í Hlaupasamtökum Lýðveldisins, og sjóbaða, árið um kring. Yfir vetrarmánuðina fækkar sjósundum, en í ljósi veðurspár Veðurstofu Lýðveldisins er ljóst að menn geta líklega sleppt sjósundi á morgun, bleytan verður til staðar og fyrir hendi engu að síður. Hraustustu menn munu vaða elginn og finna eigi mun á því hvort þeir eru í sjó eða á landi. Þetta verður frábært!

Veðurstofan varar við mikilli úrkomu á sunnanverðu landinu á morgun

Þjálfari herðir tökin

Það blés ekki byrlega til hlaupa í dag, mánudag, hvöss sunnanátt, rigning og almennt niðurdrepandi veður utandyra. Mann langaði einna helzt til að halda sig innandyra, draga fiður yfir haus og gleyma hlaupum. En þannig hugsa náttúrlega ekki alvöru hlauparar. Menn draga saman gírið í tösku og halda til Laugar. Ég var með nýja tösku í dag, sú gamla var búin að gera sitt gagn, heimilisfólkið var farið að kvarta yfir henni, dugði ekki einu sinni að hafa hana úti á svölum, alls staðar olli hún angri. Svo að hún lenti í öskutunnunni í gær og ég fékk gömlu sundtösku sonarins. Hann hefur forframast svo í sundíþróttinni að hann ber sundtösku merkta Lýðveldinu dags daglega. Nema hvað, til hlaupa mættir margir af máttarstólpum Hlaupasamtakanna: Vilhjálmur, Ólafur Þorsteinsson, Ágúst, dr. Friðrik, Guðmundur, Magnús, Þorvaldur, Björn, Helmut, Una, Haukur, óþekkt kona, Ólafur ritari, og Margrét þjálfari. Í Brottfararsal gerði fnykur vart við sig og ljóst að einhver hafði ekki þvegið gallann sinn nokkrar undangengnar vikur. Af vináttu og virðingu fyrir hlaupurum, ástvinum þeirra og fjölskyldum, verður ekki farið nánar út í þessa sálma né nöfn nefnd - en brýnt sem fyrr fyrir hlutaðeigandi að sýna félögum sínum þá nærgætni og tillitssemi að mæta til hlaupa í hreinum hlaupafatnaði. Una hafði lagt frá sér Garmin-tækið sitt úti á tröppum svo að það næði tungli meðan hún blandaði geði við hlaupara inni. Er út var komið aftur var búið að stela tækinu hennar og er ótrúlegt til þess að hugsa að ekki megi líta af svona grip í fáeinar mínútur en búið er að nema það á brott. Hvers konar fólk gerir svonalagað eiginlega?

Það mátti skilja á þjálfaranum að nú væri hveitibrauðsdögunum lokið og nú tæki alvaran við. Birni og Helmut var svo brugðið við þessar fréttir að þeir lögðu af stað án þess að hlýða á fyrirmæli dagsins og fóru Aumingja. Aðrir hlýddu eins og þæg skólabörn á þjálfarann lýsa plani dagsins: fara hratt út á Hofsvallagötu, upp á Hringbraut, vestur úr og út að JL-húsi, þaðan út á Nes og að Hagkaupum, tilbaka Nesveg og að Faxaskjóli. Þar voru farnir sprettir þennan hálfhring sem Faxaskjólið er, 400 m, og svo hægt tilbaka. Þrisvar sinnum. Þetta tók á, enda hafði maður storminn í fangið á þessari leið. Samt voru menn furðu sprækir að fara þetta, m.a.s. próf. Fróði, sem er nú eiginlega orðinn spítalamatur, svo lasburða er hann orðinn, gengur milli lækna og sjúkraþjálfara þessi missirin og fær bara misvísandi upplýsingar um hvað að honum gangi og hvernig bezt sé að bregðast við kvillunum. Þrátt fyrir að hann hafi ströng fyrirmæli um að hvíla næstu þrjár vikurnar, hleypur hann ákafliga og tekur þéttinga - en ekki þéttinga eins og hann tæki væri hann heill heilsu. Við mættum Neshópi á Ægisíðu við sjoppuna og var þeim mjög brugðið, ekki vön því að mæta okkur á þessum slóðum á mánudögum.

Þegar við Ágúst vorum búnir að fara þrjú Faxaskjól - stöldruðum við um stund á mótum Ægisíðu, Faxaskjóls og Hofsvallagötu - Ólafur Þorsteinsson kom utanúr sortanum íklæddur Iðnaðarbankahúfunni og saman lögðum við í Ægisíðuna. Ekki var árennilegt að fara þarna um í sunnanrokinu, en við létum okkur hafa það. Einhverra hluta vegna sneri frændi minn við á miðri Ægisíðu, en við félagar skeiðuðum áfram inn í Skerjafjörð á töluvert hröðu tempói, sennilega undir 5 mín. Fórum öfugan mánudagshring og vorum bæði hissa og stoltir yfir því að heilar okkur byggju yfir hæfileika og sveigjanleika til þess að breyta áratugahefð um Mánudagshlaup og bara yfirleitt að rata þessa leið ... öf..., nei, öfugt. Það kom Ágústi á óvart að ritari, þessi feiti maður, skyldi geta haldið í við hann alla leiðina á þessu hraða tempói. Hafði hann orð á því að ritari hlyti að hafa verið að æfa í laumi undanfarnar vikur.

Teygt á stétt, mættum Magnúsi og Vilhjálmi, þeir voru á útleið, búnir með prógramm dagsins. Einar blómasali kom til þess að blanda geði við félagana, farinn á sál og líkam sökum bakverkja. Í potti var m.a. rætt um lögregluaðgerðir helgarinnar og gerður góður rómur að framgöngu Lögreglustjóra Lýðveldisins, sem virðist loksins vera farinn að taka á því óþolandi ástandi sem ríkt hefur í Miðborginni undanfarin ár. Rætt um bátinn blómasalans, Færeyinginn, og spurt hvenær Hlaupasamtökunum yrði boðið í túr. Jújú, það gæti sosum orðið af því. Og hvað tekur báturinn marga? 20? Njaaei, það geta kannski 5 fengið pláss þar...

Nú eru tímamót framundan: miðvikudagur 12. september. Þá segir sagan að Karl muni mæta til hlaupa að nýju eftir langt hlé. Ekki væri verra ef Sjúl léti svo lítið að sýna sig í kátra sveina hópi. Í gvuðs friði, ritari. 

Kære nordiske venner

Já, í dag var hlaupið í anda sannrar, norrænnar vináttu, nánar tiltekið í kompaníi við þær mæðgur Else og Maju. Þær mættu kappklæddar og útrústaðar myndavél - og þótti við helst til fáklæddir sem aðeins vorum á stuttum hlaupabuxum og með handleggina bera. Mættir á sunnudagsmorgni voru Magnús, Þorvaldur, Guðmundur, Hjörleifur, Birgir, Kári, annálaritari og loks kom Einar blómasali er tvær mínútur lifðu til brottfarar. Hann dokaði við á gólfi Brottfararsalar, baðaði út öngunum og benti á klukkuna babblandi einhverja vitleysu: Tvær mínútur, sagði hann. Hann fékk mjög eindregin tilmæli að drulla sér út í klefa og hafa fataskipti. Það olli nokkrum vonbrigðum að hvorugur þeirra fóstbræðra, Ólafur Þorsteinsson eða Vilhjálmur Bjarnason, mættu til hlaups í dag. Það var rifjað upp að sá fyrrnefndi hafði boðið þeim síðarnefnda til óðala sinna í Hrútafirðinum og mun Villi hafa þekkst boðið. Lýsir það stórlyndi og göfugmennsku frænda míns, blíðlyndi og hógværð, eins og hann á ættir til, að bjóða helzta gagnrýnanda og andmælanda sínum til helgardvalar á þessum sælureit að Melum.

Jafnframt var það rifjað upp að VB var mættur í útvarpsþáttinn Vikulok í gærmorgun og fór þar mikinn, afgreiddi skipulagsóreiðu í einu orðinu, efnahagsóreiðui í hinu. Spurt var hvort hann hefði munað eftir að nefna Hlaupasamtökin - að það mun hann ekki hafa gert, en minntist víst eitthvað á hreyfingu.

Veður ákjósanlegt til hlaupa, hlýtt og bjart. Það var enginn vandræðagangur á okkur á Brottfararplani, við tættum af stað þegar blómasalinn kom út og fórum allhratt. Magnús og Guðmundur fremstir, sá síðarnefndi allur að koma til og að verða með beittustu hlaupurum. Magnús hvarf og segir ekki meira af honum á blöðum þessum. Það var reynt að halda uppi samræðum við norsku mæðgurnar, ýmist á skandinavísku, blandinavísku eða ensku. Birgir var duglegur að fræða þær um land og þjóð og ýmis sérkenni, að vísu kannaðist ég ekki alveg við lýsingar hans á sérkennum, hann hefur kannski verið að rugla saman við Færeyjar.

Í Nauthólsvík beygðum við Birgir og Kári niður á rampinn, afklæddumst og skelltum okkur í sjóinn, og vorum þar myndaðir í bak og fyrir. Komum svo upp úr og héldum mikla kroppasýningu sem vakti hrifningu. Myndirnar munu birtast í norsku hlaupatímariti og mega sjósundskappar búast við frægð á Norðurlöndunum í framhaldi. Einar kom gangandi inn í Nauthólsvík, farinn í bakinu. Hann var látinn gera teygjuæfingar sem geta lagað slæmt bak - en kaus að halda ekki áfram hlaupi, heldur ganga tilbaka. Það var niðurbrotinn blómasali sem gekk heimleiðis, en við héldum áfram inn í kirkjugarð. Fórum gegnum lúpinugerðið Jörundar og komum upp þegar komið var framhjá hliðinu í garðinn, Birgir talaði svo mikið að hann áttaði sig ekki á staðsetningunni. Ég varð að hrópa á fremstu hlaupara og fá þá til að snúa við, annað hefði verið brot á ritúali.

Stundum var staldrað við og genginn smáspölur, en líklega heldur minna en alla jafna. Tempóið var hægt og notalegt, okkur leið bara vel alla leiðina. Fórum niður á Sæbraut og þá leið tilbaka. Birgir sagði mæðgunum frá Tónlistarhöllinni er senn myndi rísa í höfninni. Sagði hann þeim að glerið sem nota ætti í húsið væri búið til úr sandi, framleitt á tvö hundruð metra dýpi undir sjávarbotni og kostaði tvo milljarða, hannað af Ólafi Elíassyni. Þeim fannst þetta afar athyglisvert. Upp Ægisgötu, Túngötu, Hofsvallagötu til Laugar.

Í útiklefa sat Einar blómasali niðurbrotinn á sál og líkama, hafði setið þannig í 30 mín. og kom sér ekki til þess að gera neitt. Hann lifnaði strax við er við birtumst og brátt var hann farinn að brosa á ný, honum fannst lífið hafa öðlast tilgang á nýjaleik er félagar hans komu, uppfullir af góðum ráðum við bakverk. Birgir hófst þegar handa um að láta blómasalann teyjga. Ég fór inn í sturtu og rakstur. Er ég kom út aftur, var enn verið að teygja blómasalann, þessi mikli skrokkur lá á gólfi útiklefa og Birgir jógi sat ofan á honum og teygði í skankana - baðgestum er komu í útiklefa var nokkuð brugðið við þessa sýn, sem vonlegt er. Í potti voru mættir dr. Baldur og dr. Einar Gunnar, var nokkuð rætt um ónefnda, fjarstadda félaga. Kári kvaddi, hann fer til Franz í fyrramálið, nánar tiltekið Rennes, verður þar fram í desember að vísindast.

Á morgun er nýtt hlaup - með þjálfara. Í gvuðs friði, ritari.